Nova xornada de atrasos e incidencias nas estacións de tren galegas

O Alvia Santiago Madrid de primeira hora chegou hoxe a destino con 46 minutos de atraso. O que viña de Madrid a Ferrol atrasouse 15 minutos, e os viaxeiros dun rexional de Vigo acabaron chegando en bus. Unha nova xornada de incidencias que, segundo lamentan algúns pasaxeiros, se repiten con demasiada frecuencia.

"A liña de Ourense a Santiago ten atrasos con moita frecuencia".

"O meu tren atrasouse, paraba cada pouco e quedaba sen luz".

"O de Ourense que vén de Madrid ás veces tarda moito en chegar aquí".

A chegada dos trens Avril a Galicia fíxose agardar, pero agora que están operativos continúan as esperas, con atrasos en 8 de cada 10 convois. Un problema que tamén afecta aos viaxeiros de media distancia.

"Renfe moitas veces usa trens de longa distancia para facer o servizo Avant de media distancia, polo que tamén padecemos eses atrasos. O que queremos os usuarios habituais é un bo servizo que nos permita chegar a tempo a traballar ou estudar", explica Lucas García Blanes, voceiro da Plataforma de Usuarios de Trens de Media distancia de Galicia.

A esta situación súmase o recorte das indemnizacións. Desde xullo deixaron de compensarse os atrasos de quince minutos nos servizos da alta velocidade. 

"Na media distancia non nos afecta porque temos o bono gratuíto, pero con esta decisión Renfe amosa a súa falta de compromiso coa calidade.  Se aumenta o tempo para indemnizar é que son conscientes de que non van ser puntuais, e que os trens van chegar cada vez máis tarde", lamenta o voceiro.

Demandan un servizo de maior calidade, con máis puntualidade e frecuencias, sobre todo a primeira hora para que os traballadores se poidan desprazar entre as cidades.