Novo altercado cun ferido no edificio ocupado da rolda de Nelle

Un home ferido, gritos, un televisor e un armario tirado ao patio de luces. É o saldo que deixan os últimos altercados neste conflitivo edificio da ronda de Nelle. Os veciños están desesperados e atemorizados, tanto que xa ningún se atreve a falar, nin de costas á cámara.

"Está toda a veciñanza asustada, ameazan a xente e non se cortan, hai roubos, pelexas, delinquen. Todos o vemos e temos que calar", di un veciño anónimo.

Están fartos de que ninguén poña fin a un conflito que, din, vai a peor cos anos. Aseguran que o perfil dos ocupantes mudou, e agora son violentos e trafican con droga. Esta mesma mañá testemuñamos como a policía cacheaba un deles na rúa.

"Vémolo a plena luz do día, venden droga, veñen xonquis comprar. Desmandouse totalmente o tema, antes eran familias pero agora son delincuentes", di o veciño.

Algúns comercios traballan a porta pechada para evitar problemas. Nos bloques lindeiros din que non poden durmir polo ruído e teñen medo de que algún día haxa unha desgraza. 

"Non teñen auga e rouban a luz, eu teño medo de que un día haxa un incendio, é todo unha pena. Ademais tiran lixo e hai cristais que poden caer á rúa, é un perigo pasar por aí", lamenta outra veciña anónima.

O Concello tivo que retirar toneladas de lixo das zonas comúns, houbo inundacións, liortas, lanzamento de obxectos e agora tamén ameazas aos veciños, os mesmos que se preguntan que máis ten que pasar para espertar do pesadelo.