O Goberno nega atrasos e asegura que os Avril chegarán a Galicia en marzo

O Goberno asegurou este xoves que "segue adiante" a data comprometida polo ministro de Transportes, Óscar Puente, para a chegada dos trens Avril a Galicia, que comezarían a súa venda o 1 de marzo.

 Puente prometeu que estes convois estarían dispoñibles en marzo.

Con todo, o operador ferroviario Renfe desbloqueou a venda de billetes para o mes que vén e non inclúe viaxes realizadas en tempos inferiores aos actuais, polo que non contaría coa utilización dos Avril, que permitirán reducir en máis de 30 minutos o traxecto entre Vigo e Madrid, deixándoo en pouco máis de 3 horas e media.

Así, o Goberno vinculou o desbloqueo da compra para o mes de marzo co obxectivo de facilitar a adquisición de billetes para Semana Santa, pero desligouno da chegada dos Avril, indicando que o venres 1 de marzo se poñerán á venda os novos servizos de tren de alta velocidade.

"Non hai ningún atraso. Ao contrario, adiántase a venda de billetes que comprenden a Semana Santa e mantense a data para os billetes ordinarios de marzo", reivindicou o Executivo.

Tamén Renfe saíu ao paso das últimas informacións que apuntan cara a un novo atraso da chegada destes trens.

"Renfe facilita aos seus viaxeiros o poder adquirir os billetes con antelación e así poder organizar os seus desprazamentos en Semana Santa, época de máxima afluencia de viaxeiros. Ante calquera posible modificación do servizo, esta sería notificada con antelación por parte de Renfe aos seus clientes", indicou a compañía en declaracións a Europa Press, deixando aberta a porta a un cambio nos billetes.

En xaneiro, Puente dixo que entrarían en funcionamento en marzo, pero agora Renfe aínda non os ofrece.

Na actualidade, na súa web a compañía só permite comprar billetes ata o 31 de marzo, polo que se descoñece se en abril rodarán polas vías galegas os trens Avril ou se haberá unha modificación e chegarán antes.

Desde a Xunta lamentan que este atraso supoña que non haberá conectividade con alta velocidade máis alá de Ourense antes da Semana Santa e que se perda esa "oportunidade turística".

Polo tanto, e para poñer fin ao “misterio cósmico” relativo aos trens Avril, Rueda pediu ao Executivo estatal información "veraz" sobre estes trens, xa que a día de hoxe a Xunta non ten coñecemento nin de “cantos trens van chegar” á comunidade.