O 40 por cento dos galegos ten problemas de exceso de peso

No Día Mundial da Obesidade, os pacientes de nutrición de distintos centros de saúde ourensáns están citados para unha sesión extraordinaria: unha andaina por prescrición médica.

"Porque me mandou a nutricionista, que viñera hoxe camiñar. Eu ando moito todos os días. Se quedamos na casa, acabamos atrofiados". "Síntome máis lixeira, vou avanzando e estou mellor", comentan dúas participantes.

Segundo os datos da última enquisa europea de saúde, o 39 % da poboación galega ten sobrepeso, e máis de catrocentas mil persoas, obesidade. Unha condición que afecta a calidade de vida e que supón, ademais, un factor de risco para outras doenzas.

"A hixiene, o autocoidado, problemas nas articulacións como dor de xeonllos, das costas... e tamén problemas metabólicos: diabetes, hipertensión...", di Ana Sáez Ribao, enfermeira do centro de saúde da Ponte.

Subir as escaleiras en lugar de empregar o ascensor, ir andando ao traballo ou prescindir dos procesados na alimentación son algunhas recomendacións ben coñecidas pero pouco practicadas.

"Hai xente moi deportista e outra que pasa moito tempo cos ordenadores, etc". "Ás veces, moi mala alimentación, porque traballamos, imos ás comidas rápidas...", din dúas participantes da andaina.

A actividade completouse con mesas informativas, para concienciar sobre a importancia dos hábitos saudables.