O 44 % dos homes opina que a igualdade foi demasiado lonxe e que os discrimina

Un 44,1 % dos homes cre que "se chegou tan lonxe" na promoción da igualdade das mulleres que agora "se está discriminando" os homes. Así o recolle a primeira enquisa monográfica sobre Percepcións sobre a igualdade entre homes e mulleres e estereotipos de xénero publicada este luns polo Centro de Investigacións Sociolóxicas (CIS). Ademais, o 32,5 % das mulleres consultadas na enquisa comparten a mesma opinión respecto a esta cuestión.

Entre outros datos, destaca que o 67,2 % das mulleres cre que as desigualdades de xénero son "grandes ou bastante grandes", mentres que a porcentaxe se reduce ao 48,2 % dos homes enquisados.

Por último, no referido aos estereotipos de xénero, para o 66,5 % dos españois ver pornografía é máis propio de homes que de mulleres, mentres que o 84,9 % dos enquisados afirma que pagar para manter relacións sexuais é máis propio do sexo masculino.