O aeroporto de Vigo executa os últimos traballos para reabrir a súa pista o venres

As obras de rexeneración do pavimento da pista do aeroporto de Vigo están na súa fase final e xa se están executando os últimos traballos para a súa posta en servizo este venres, tal e como estaba previsto, segundo informa Aena.

Esta semana estanse realizando tarefas de pintura, comprobacións eléctricas e calibracións de axuda á navegación.

O luns pola tarde un avión laboratorio realizou as tarefas de calibración dos sistemas eléctricos nun dos extremos da pista e continuará cos sistemas do outro extremo e coa calibración do ILS (sistema instrumental de aterraxe, polas súas siglas en inglés).

Despois de catro semanas do peche ao tráfico aéreo Aena dá por finalizada a fase de rexeneración do asfalto de pista.

A obra continuará noutras zonas do campo de voos que non afectan a operatividade do aeroporto.

O aeródromo vigués pechou ao tráfico aéreo o pasado 6 de maio para executar na súa pista as actuacións de rexeneración profunda do pavimento dentro da obra de renovación do campo de voos.

Esta obra, que foi adxudicada á UTE Padecasa, Infraestruturas Conelsan e Insae Infraestruturas por 23.622.000 euros netos, recolle tamén a substitución completa da iluminación aeronáutica por tecnoloxía led, a renovación da drenaxe da pista e actuacións na plataforma de viraxe dos avións, segundo informou Aena ao anunciar o proxecto.

As datas de peche foron coordinadas con todos os axentes implicados para que reorganizasen a súa actividade neste período en que Peinador estivo pechado.

As compañías aéreas reformularon o seu persoal de voos, trasladándoa nalgúns casos ao aeroporto de Santiago-Rosalía de Castro, como Air Europa e Binter, ou aumentando a capacidade das súas rutas nos aeroportos máis próximos.