O Arenteiro empata sen goles en Ganzábal

O Arenteiro sumou a terceira xornada consecutiva sen perder, xusto as que leva no banco o novo adestrador, Javi Rey. En Ganzábal sacou un empate sen goles que lle permite manter o liderado, agora con dous puntos de renda sobre o Guijuelo, que non afrouxa.

O Langreo buscaba achegarse aos postos de salvación, nunha situación comprometida. Pero topou coa solidez dun Arenteiro. que non lle permitiu crear accións de verdadeiro perigo. Na primeira metade houbo achegamentos, pero impuxéronse as defensas nas dúas áreas.

Na continuación, o Arenteiro si que dispuxo dalgunha ocasión clara, nun remate de Escobar á saída dun córner que marchou desviado e noutro par de ocasións de Pibe, que tampouco estivo atinado coa portería rival. Ao final, non houbo goles en Ganzábal.