O papa recibe unha delegación de Begonte polo 50 aniversario do seu belén electrónico

Unha delegación encabezada polo rexedor local de Begonte reuniuse co papa no Vaticano. Alí entregáronlle unha maqueta do monumento que prevén colocar na praza Irmáns Domínguez Guizán.

O lugar está situado ao carón da sede do famoso nacemento, que este Nadal celebra os 50 anos da súa fundación. Será o primeiro dos 19 elementos que se van instalar en cada unha das parroquias dun concello coñecido polo seu belén electrónico.

Xulio Xiz, vicepresidente da Asociación cultural José Domínguez Guizán: "Tivemos a idea, con motivo deste cincuentenario, de facer un monumento en cada unha das parroquias. E xunto a el vanse colocar dúas monumentais zocas, coma o modelo que se lle levou ao papa, como símbolo do camiño a un lugar destacado". 

Fundado en 1972 polo párroco José Domínguez, o belén de Begonte é festa de interese turístico de Galicia dende 2014. Nel colaboran os veciños da vila chairega, que estes días comezan a traballar na montaxe dun nacemento do que din sentirse orgullosos.

Carlos Torres, colaborador do belén de Begonte: "Para nós é un orgullo o traballo que estamos facendo, porque aquí vén moita xente, nenos e maiores. Botamos dous meses que traballa seguido o belén. Calculamos que pasan máis de 40.000 persoas cada ano".

Ramiro Cruz, encargado do mantemento do belén de Begonte: "A maioría dos veciños estamos moi orgullosos. Begonte é coñecido polo belén, máis que nada".

O belén de Begonte conta ademais co seu propio museo, onde se amosan pezas antigas. Estímase que máis dun millón de persoas puideron visitar xa o nacemento ao longo do seu medio século de historia. Este ano poderán velo de novo a partir da primeira fin de semana de decembro.