O Celta Fortuna cumpre en Teruel (0-2) e mantén a posición de privilexio
O triplo troco de Claudio no descanso resultou fundamental
Antañón fabricou a xogada do primeiro gol e Miguel Román marcou o segundo
O Celta Fortuna continúa con paso firme pola 1ª RFEF. Gañou no campo do Teruel sen facer un gran partido pero dando unha sensación de seguridade absoluta desde o primeiro ata o último minuto (0-2).
No primeiro tempo avisou con catro oportunidades moi claras. Dúas foron do ourensán Hugo Álvarez. Outra de Miguel Román e unha última de Pablo Durán. Enfronte, un equipo con moitos problemas para facer gol (só leva marcados catro) e que tardou máis dunha hora en rematar a portería.
Claudio Giráldez fixo tres trocos no descanso e un dos xogadores que incorporou, Lucas Antañón, fabricou a xogada do primeiro gol, marcado en propia porta por Sanchís. O número de ocasións diminuiu a partir dese tanto e só había que agardar por un segundo gol que decidise o partido. Chegou a dez minutos para o final e o protagonista foi Miguel Román.
