O comisario europeo de Xustiza volve reclamar aos partidos a renovación do CXPX
O comisario europeo de Xustiza volve reclamar aos partidos a renovación do CXPX
Reiterou o seu chamamento ás forzas políticas a renovalo e a reformar despois o sistema de elección dos vogais
![](https://img-g24-crtvg.flumotion.com/prog24/2023/20230809/20230809cxpx_arquivo_300622.png)
O comisario europeo de Xustiza, Didier Reynders, lembrou as "serias preocupacións" que suscita en Bruxelas o bloqueo do Consello Xeral do Poder Xudicial (CXPX) e reiterou o seu chamamento ás forzas políticas a renovalo e a reformar despois o sistema de elección dos vogais.
"A Comisión reitera o seu chamamento a todas as partes implicadas para que apliquen as recomendacións formuladas nos Informes sobre o Estado de Dereito en 2022 e 2023", manifesta nunha carta remitida a Xuízas e Xuíces para a Democracia (XXpD), que lle escribiu a finais de xuño para trasladarlle a súa preocupación polo bloqueo do CXPX superados xa os catro anos e medio en funcións.
Na súa misiva, difundida este mércores pola asociación de xuíces, Reynders lembra que o informe de 2023 reflicte que a situación do CGPX "suscita serias preocupacións, xa que, en primeiro lugar, non houbo avances en canto á súa renovación a pesar da urxencia e, en segundo lugar, non se tomaron medidas para adaptar o proceso de nomeamento dos seus vogais elixidos entre xuíces e maxistrados tendo en conta as normas europeas".
O informe tamén destacou que a falta de renovación do Consello Xeral do Poder Xudicial repercute no nomeamento dos maxistrados do Tribunal Supremo e no sistema xudicial no seu conxunto.
"Teña a seguridade de que a Comisión mantén o seu compromiso de defender o Estado de Dereito en todos os Estados membros, e de que seguirá colaborando coas autoridades españolas" para promovelo, afirma na súa carta.
XXpD alertou tamén o comisario do "abuso" que se está facendo das comisións de servizo para cubrir vacantes xudiciais, un feito que, lembra o propio Reynders, tamén foi analizado nun dos informes sobre o Estado de dereito en España.
Os xuíces substitutos e maxistrados suplentes, nomeados polo Consello Xeral do Poder Xudicial a proposta dos Tribunais Superiores de Xustiza, poden exercer funcións xurisdicionais nos xulgados "a pesar de non estar suxeitos ao mesmo procedemento de selección e ao mesmo programa de formación que os xuíces de carreira", apuntouse no informe.