O Concello da Coruña aproba por unanimidade iniciar o proceso para reclamar a Casa Cornide á familia Franco

O Concello da Coruña aprobou por unanimidade no pleno ordinario o procedemento para reclamar a titularidade da Casa Cornide, en mans da familia Franco. PSOE, PP e BNG deron luz verde este xoves para iniciar este proceso que permitirá revisar de oficio as decisións tomadas polo Concello en 1962, que entregaron o inmoble á familia do ditador.

A Casa Cornide é un palacete exemplo da arquitectura residencial da Ilustración en Galicia, do século XVIII no centro da Coruña que en 1962 pasou a ser propiedade de Carmen Polo e, polo seu matrimonio en gananciais, tamén de Francisco Franco, tras ser patrimonio do Ministerio de Educación e logo do Concello da Coruña.

O procedemento inclúe revisar a declaración de nulidade do proceso de venda da Casa Cornide a Carmen Polo, e a intención de pedir ao Goberno que revise a permuta e un trámite de audiencia cos Franco, dentro do proceso para buscar a recuperación do edificio para o patrimonio público.

O Concello instará o Ministerio de Educación e de Facenda a realizar unha revisión de oficio desta permuta. Agora comeza un prazo de 15 días para alegacións e de seis meses para a resolución do expediente. Os tres grupos políticos defenderon na sesión plenaria a súa intención de que este palacete volva ser "de dominio público" e de todos os "coruñeses e coruñesas". Ao mesmo tempo, o público está pendente da apertura da Casa Cornide, pois ao ser Ben de Interese Cultural debe permitir visitas catro días ao mes desde hai tempo, cuestión que non se cumpriu ata o de agora.

A Xunta comunica aos Franco que deben "cumprir a lexislación e abrir" a Casa Cornide

O conselleiro de Cultura da Xunta, José López, asegurou este xoves que o seu departamento comunicou a semana pasada á familia Franco que debe "cumprir a lexislación e abrir catro días ao mes" a Casa Cornide, na cidade da Coruña.

Nun acto na Coruña, o recentemente nomeado titular de Cultura explicou aos medios que a situación da Casa Cornide é un asunto que se atopou sobre a mesa ao acceder ao cargo, pois a Xunta iniciou en 2021 o procedemento para declarala Ben de Interese Cultural, o que é firme desde 2023, pero o palacete nunca se abriu ao público como esixe esta situación.

López asegurou que o seu departamento "comunicou xa á familia Franco" a semana pasada que "ten que cumprir a lexislación e abrir catro días ao mes". Non ten constancia da recepción desta comunicación, que foi enviada por correo ordinario, pero dixo que os Franco "teñen que mandar ese programa de aperturas" e cumprir así as condicións que están pendentes desde o inicio do procedemento fai tres anos. Segundo López, isto mostra o seu "compromiso claro de esixir que se cumpra coa legalidade" nesta cuestión.