O condutor acusado de estragar as alfombras florais de Gondomar ocultou no psicotécnico que precisaba lentes

A Garda Civil de Gondomar investiga o mozo vigués de 20 anos que este domingo estragou as alfombras florais do Corpus en Gondomar por un por un presunto delito de danos, así como por outro de falsificación documental.

Coa colaboración da Policía Local de Gondomar e a de Vigo, a Garda Civil logrou identificar e localizar ao presunto autor dos feitos, o cal ten unha alta gradación en miopía, polo que ten que usar lentes para conducir.

A pesar diso, cando no ano 2021 realizou o recoñecemento psicotécnico para obter o permiso de conducir, usou lentes de contacto, falsificando a declaración xurada para evitar que lle figure dita restrición no seu permiso de conducir.

Por iso investígaselle tamén por un delito de falsificación documental, cuestión que se lle comunicou á DXT, propoñendo ao novo para un recoñecemento extraordinario psicotécnico.

O mozo tamén está denunciado por infracción de tráfico, ao circular por dirección prohibida de forma temeraria, o que pode supoñer a perda de 6 puntos, ademais da sanción correspondente.

Segundo informou este martes o instituto armado, o pasado domingo de madrugada, tras saltarse un sinal de prohibido o paso, outra de dirección obrigatoria e varios valos metálicos que protexían as alfombras florais do Corpus na Rúa Eduardo Iglesias de Gondomar, o investigado provocou danos co seu vehículo nas tres alfombras de flores preparadas, de 25 metros de longo cada unha e 3,5 metros de ancho.

Durante a mañá do domingo, a Garda Civil recibiu varias denuncias por parte dos representantes das asociacións de veciños propietarios das alfombras florais danadas, valorando os danos en máis de 10.000 euros.

As dilixencias van ser remitidas ao Xulgado de Instrución de Garda de Vigo.