O condutor do autobús que atropelou un mozo en Aninovo nega que dese marcha atrás ou que manobrara co vehículo

A investigación xudicial continúa aberta para aclarar as circunstancias do accidente de Aninovo en que faleceu atropelado un rapaz de 18 anos de Sigüeiro.

O condutor do autobús di que foi o primeiro en partir da discoteca, cando completou as prazas. Non pode asegurar que fose Nicolás o que lle petou na porta cando xa estaba en marcha.

"Cando ía incorporarme ao carril vin un rapaz e petoume na porta, e eu díxenlle que non abría porque tiña o autobús completo, e fíxenlle un xesto para que collese o coche de atrás", di.
 

A partir de aí di que o perdeu de vista e que non sabe o que pasou. O que asegura é que non fixo ningunha manobra co autobús.

"En ningún momento dei marcha atrás nin puxen a marcha atrás para nada".

O condutor foi localizado na Laracha cando xa rematara o servizo. Deu negativo nas probas de alcol e drogas e colaborou en todo momento coa Garda Civil. O autobús permanece inmobilizado ata que avance a investigación.