Estes son os tres municipios galegos que lograron un saldo vexetativo positivo en 2023
Estes son os tres municipios galegos que lograron un saldo vexetativo positivo en 2023
Ames, Oroso e Corcubión rexistraron máis nacementos que mortes o ano pasado
Hai máis de trinta anos que o conxunto de Galicia non presenta un saldo vexetativo positivo
O saldo vexetativo -a diferenza entre nacementos e defuncións- volveu ser negativo en Galicia en 2023, con 18.713 persoas menos, un descenso do 8,7 % con respecto a 2022, segundo os datos provisionais do Movemento natural da poboación elaborado polo Instituto Galego de Estatística (IGE).
Hai máis de trinta anos que o conxunto de Galicia non presenta un saldo vexetativo positivo, lembra o IGE que, sinala, que unicamente tres dos 313 municipios galegos tiveron máis nacementos que defuncións o pasado ano.
Trátase de Ames, Oroso e Corcubión, todos na provincia da Coruña, con 47, 2 e 2 nacementos máis que falecementos, respectivamente, o ano pasado.
Á parte, en Oza-Cesuras (A Coruña) e en Cerdedo-Cotobade (Pontevedra), os únicos municipios fusionados en Galicia, non constan datos e en Negueira de Muñiz (Lugo) e Mondariz Balnerario (Pontevedra) o saldo foi neutro.
No resto de Galicia o saldo foi negativo; incluídas as sete cidades, onde Vigo (-1.439) e A Coruña (-1.237) tiveron os peores rexistros.
Pero a diferenza entre nacementos e mortes tamén foi negativa en Ourense (-679), Ferrol (-570), Lugo (-455), Pontevedra (-363) e Santiago de Compostela (-349).
O estudo sinala, ademais, que case catro de cada cinco nais (78,9 %) en Galicia en 2023 tiñan entre 30 e 44 anos; cando dez anos antes esta porcentaxe era do 76,8 %, dous puntos menos.
As mulleres que foron nais entre os 40 e os 44 anos pasaron do 7,9 % de 2013 (1.571) ao 12,8 de 2023 (1.800).
13.975 nenos o ano pasado
No conxunto de Galicia naceron 13.975 nenos o pasado ano, un 3,59 % que en 2022, co que continúa o descenso anual ininterrompido iniciado en 2009. Practicamente catro de cada cinco nacementos (78,2 %) producíronse nas provincias da Coruña e Pontevedra.
En 2023, tamén faleceron en Galicia 32.688 persoas, un 6,6 por cento menos que o ano anterior.
O estudo elaborado polo IGE inclúe os datos de matrimonios, que en Galicia caeron en 2023 nun 3,7 por cento en total respecto ao ano anterior, ata os 9.150.
A inmensa maioría son entre homes e mulleres, o 97,7 %. Os matrimonios entre dous homes foron 101, un 12,1 % menos que o ano anterior e as unións matrimoniais entre dúas mulleres caeron un 17,6 %, ata as 103, segundo os datos divulgados este venres.
