O Deportivo Abanca empata sen goles co Tenerife e segue sumando
O equipo de Fran Alonso aumenta a catro puntos a vantaxe co descenso tras a derrota do Betis
Unha xornada menos, un punto máis. Ese é o premio que leva o Deportivo Abanca desta fin de semana. A derrota do Betis fronte ao Eibar combianda coa igualada sen goles en Riazor das deportivistas fronte ao Costa Adeje Tenerife permite este pequeno rédito.
Millene Cabral foi a protagonista das mellores opcións galegas no primeiro tempo. Disparou desviado, levou o balonazo no despexe de Noelia Ramos, e volveu atoparse coa intervención da gardameta xa contra o descanso. A brasileira quedou con pouco oco para o disparo.
O segundo tempo foi diferente. O Costa Adeje deu un paso adiante e puxo en perigo a meta de Inés Pereira. Lena Silano obrigoulle a intervir á gardameta portuguesa. Clau Blanco, incorporada ao partido no intermedio, buscou o gol cun disparo que se foi cruzado.
Fran Alonso introduciu varios trocos pero sen incidencia no xogo e no marcadador. O empate, o cuarto nos últimos cinco partidos, foi un mal menor. A vantaxe co descenso sobe a catro puntos.
