Escrivá será novo gobernador do Banco de España por seis anos e Óscar López substitúeo no ministerio

O ministro para a Transformación Dixital e da Función Pública, José Luis Escrivá, será o novo gobernador do Banco de España por un mandato de seis anos, pola súa "capacidade técnica", "experiencia" e "coñecemento das institucións europeas", anunciou este mércores o titular de Economía, comercio e Empresa, Carlos Cuerpo.

O ministro confirmou este mércores a designación de Escrivá na súa comparecencia no Congreso para dar conta do nomeamento.

Cuerpo debullou as cualidades de Escrivá para desempeñar o cargo e destacou que poderá asistir a próxima semana a Frankfurt á reunión de política monetaria do Banco Central Europeo  que se celebrará o 12 de setembro.

Pola súa anda, o presidente do Goberno, Pedro Sánchez, destacou tamén a idoneidade de Escrivá para o seu novo cargo. 

Escrivá é ministro desde xaneiro de 2020, cando asumiu a carteira de Seguridade Social, Inclusión e Migracións no Executivo de coalición con Unidas Podemos e, desde novembro de 2023, no Goberno que forman o PSOE e Sumar, á fronte da carteira de Transformación Dixital, á que un mes despois sumou as competencias de Función Pública.

Óscar López asume a carteira de Transformación dixital

O director de Gabinete do presidente do Goberno, Óscar López, será o novo ministro de Transformación Dixital e Función Pública.

A López substituirao Diego Rubio, actual secretario xeral de Políticas Públicas, Asuntos Europeos e Prospectiva Estratéxica da Presidencia do Goberno.

Con anterioridade, López foi secretario de Organización do PSOE (entre 2012 e 2014) e estivo co xefe do Executivo na súa primeira etapa, antes de volver á primeira liña de Moncloa tras un afastamento entre ambos. Entre xullo de 2018 e ata o mesmo mes de 2021, López foi presidente de Paradores.

O novo ministro de Transformación Dixital, licenciado en Ciencias Políticas coa dobre especialidade de Administración Pública e Relacións Internacionais pola Universidade Complutense de Madrid, terá que facer fronte á nova despregadura dos fondos europeos para mellorar a dixitalización da economía española, así como levar a cabo a modernización das administracións públicas.

O PP non propoñerá subgobernador no Banco de España para non branquear a súa "colonización"

O Partido Popular non propoñerá un subgobernador para o Banco de España co obxectivo de "non branquear" o nomeamento de Escrivá como gobernador desta institución, que consideran unha "colonización".

A secretaria xeral do PP, Cuca Gamarra, anunciouno este mércores en declaracións aos xornalistas desde a sede do seu partido, onde denunciou que o nomeamento de Escrivá supoñerá que "a independencia do Banco de España queda absolutamente comprometida".

"Non se pode ser ministro de día e gobernador de noite. Isto é incompatible coa independencia e a imparcialidade que debe de quedar garantida nos órganos que teñen un labor fundamental", denunciou Gamarra.

A formación de Alberto Núñez Feijóo recalcou que non vai "participar nun cambio de cromos para branquear a colonización por parte de Pedro Sánchez" porque o PP é o "freo ao sanchismo" e lamentou que o presidente do Goberno vaia volver cometer "un erro" que xa cometeu José Luis Rodríguez Zapatero.