O euríbor sobe ao 3,5 % e encarece as hipotecas con subas de ata 600 euros ao mes

O euríbor a doce meses, o índice máis usado en España para calcular as hipotecas, segue imparable e pecha febreiro nunha taxa media superior ao 3,5 %, a maior desde novembro de 2008.

Esta importante subida rexistrada nos últimos doce meses supoñerá que os hipotecados que asinaron o seu crédito hai un ano e que teñan que revisalo co dato actual, volverán sufrir un forte encarecemento das súas cotas.

Por exemplo, para un préstamo medio de 143.854 euros (hipoteca media segundo datos do Instituto Nacional de Estatísticas, INE, de peche de 2022), a 25 anos e cun tipo de euríbor máis 1 %, a mensualidade elevarase nuns 280 euros ao mes ou 3.372 euros ao ano.

No caso dunha hipoteca de importe superior, de 300.000 euros, coas mesmas condicións, a cota incrementarase en case 600 euros mensuais ou en máis de 7.000 euros anuais.

O xestor de Magnum Sicav en Quadriga, José Lizán, manifesta que a tendencia alcista do euríbor continúa, e aínda que o indicador rexistrou nos últimos meses un movemento "vertical e virulento", non se espera que se modere a curto prazo.

"Pensamos que aínda quedan meses de discursos agresivos por parte dos bancos centrais e de 'escalada' do euríbor", engadiu Lizán.

Igualmente, o comparador financeiro HelpMyCash.com ve probable que o euríbor siga á alza. O especialista no mercado hipotecario deste comparador, Miquel Rise, asegura que "este índice pechará o mes de marzo preto do 4 % ou mesmo por riba".

Lembra que o organismo está a subir os seus tipos de interese para combater a inflación da eurozona, e que entre xullo de 2022 e febreiro de 2023, o interese do BCE pasou do 0 % ao 3 %.