O Fortuna enlaza a terceira vitoria consecutiva (3-1)
O filial do Celta afástase do descenso despois de gañarlle con claridade ao Barcelona Atlétic
Os problemas do descenso para o Celta Fortuna semellan quedar resoltos. Co triunfo diante do Barcelona Atlétic o equipo celeste sumou a terceira vitoria consecutiva e afasta ata os sete puntos o equipo que marca a posición de perigo. Pola contra o filial do Barça está cada vez máis afundido nesa zona vermella da táboa clasificatoria.
O partido comezou con moita efectividade por parte dos dous equipos. Aos catro minutos adiantouse o Celta cun gol en propia porta de Mbacke e no doce igualou o Barcelona cun remate de Cedric a centro do silledense Rubén López. Dominaba un Fortuna que colleu o mando no marcador no 39 cun gran gol do internacional sub19 Óscar Marcos.
Ese gol foi chave e máis aínda o que aconteceu á volta do descanso. Só pasaran 19 segundos cando Hugo González anotaba o terceiro e deixaba moi encamiñada a vitoria. O Barcelona botouse arriba, anuláronlle un gol por man, pero non puido inquedar a porta de Coke Carrillo.
