O furacán Helene deixa máis de cen mortos nos EUA, a maioría en Carolina do Norte
O furacán Helene deixa máis de cen mortos nos EUA, a maioría en Carolina do Norte
Preto de 600 persoas permanecen desaparecidas e un milleiro están aloxadas en refuxios
En México, son xa 22 os falecidos polo paso de John
O presidente dos Estados Unidos, Joe Biden, informou este luns de que o furacán Helene xa provocou máis dun centenar de mortos no sueste do país e que hai preto de 600 persoas desaparecidas.
Segundo un cálculo de NBC News, a cifra de mortos ascende de momento a 112: 44 en Carolina do Norte, 25 en Carolina do Sur, outros 25 en Xeorxia, 12 en Florida, 4 en Tennessee e 2 en Virginia.
"Deus queira que estean vivas (as persoas desaparecidas), pero non hai forma de comunicarse con elas debido á falta de cobertura de telefonía móbil", dixo o presidente nunha declaración institucional.
O presidente explicou que Washington despregou xa a uns 3.600 membros do persoal de emerxencias e que esa cifra "aumenta cada día". Ademais anunciou que terá que pedir a aprobación dunha partida económica ao Congreso para sufragar o custo das operacións de emerxencia e reconstrución.
"Moitas persoas non teñen nin idea de cando poderán regresar aos seus fogares, se é que algunha vez poden facelo, se é que queda un fogar ao cal regresar", dixo Biden ao constatar que "vivendas e negocios foron literalmente destruídos, arrasados ou arrastrados polo vento".
As aseguradoras estiman que os danos achéganse aos 90.000 millóns de euros e a Axencia Federal de Emerxencias cífraos en mais de 13.000 millóns.
O mandatario engadiu que non viaxará a Carolina do Norte, o estado máis afectado, ata finais de semana xa que unha visita máis temperá sería "disruptiva" coas tarefas de rescate.
Un milleiro de persoas permanecen aloxadas en refuxios habilitados polas autoridades dos seis estados afectados polo paso do ciclón.
En Carolina, a forte choiva que caeu nas montañas do Estado provocaron esborrallamentos que arrasaron estradas e tombaron postes da luz e torres de telecomunicacións ao seu paso cara ás zonas residenciais.
Helene tocou terra en Estados Unidos o xoves pola noite como furacán de categoría 4 -dun máximo de 5- e deixou un rastro de devastación nos estados do sueste do país, incluídos Florida, Carolina do Norte, Carolina do Sur, Tennessee, Xeorxia, Virxinia e Alabama.
A zona máis afectada foi a dos arredores da cidade de Asheville, en Carolina do Norte, onde a auga e o vento arrasaron comunidades enteiras.
Helene, considerado ciclón postropical desde o venres, descargará aínda ata este martes forte choiva no sur da cadea montañosa dos Apalaches.
John deixa morte e destrución no estado mexicano de Guerrero
As autoridades mexicanas informaron este venres doutros seis mortos polo furacán John, co que a cifra de falecidos aumenta a 22 desde o impacto do ciclón o luns pasado. Dezaoito pertencen ao Estado de Guerrero, no sur, tres a Oaxaca e un máis a Michoacán.
En Acapulco (Guerrero), cinco persoas foron atopadas sen vida nas últimas horas despois de que a intensa chuvia arrastrase unha gran cantidade de pedra provocando o colapso de varias vivendas. A meirande parte das vítimas apareceron sepultadas no interior das súas propias casas.
Acapulco, unha das zonas máis afectadas polo paso de John
"De golpe, empezou a subir o nivel de auga e xa houbo un tempo, un momento en que xa nos cubría a cintura", comentou un traballador da construción que vive cos seus dous tíos nunha das zonas afectadas.
Prestadores de servizos náuticos están ofrecendo as súas lanchas foraborda e motos acuáticas para rescatar persoas que levan varios días atrapadas no interior das súas vivendas.
Mentres, nalgunhas tendas de autoservizo, comezan a producirse saqueos, malia a presenza da Garda Nacional e da Mariña.
John degradouse como baixa presión remanente en Michoacán, tras rexurdir o mércores despois de tocar terra o luns como categoría 3 en Guerrero.
