Os sanitarios con contratos encadeados desde 2016 optarán a ser fixos

A ministra de Sanidade, Carolina Darias, avanzou este martes que o persoal sanitario temporal que leve traballando ininterrompidamente desde antes de xaneiro de 2016 poderá optar a un concurso de méritos para poder facerse fixos.

Así o dixo na conferencia de prensa posterior á reunión do Consello de Ministros que aprobou o real decreto co que a reforma do estatuto marco do persoal sanitario coa que se estabilizará máis de 67.000 profesionais interinos que hai no Sistema Nacional de Saúde.

A nova normativa modifica o estatuto marco do persoal sanitario para cambiar radicalmente a súa situación laboral. Os contratos de interinidade non poderán durar máis de tres anos e desaparece o concepto de eventual, malia que as comunidades poderán seguir contratando temporais por razóns xustificadas de necesidade e urxencia. Este proceso de estabilización, que debería estar rematado a finais de 2024, vai facer fixos 67.300 sanitarios.

"Fortalece o sistema e dá certeza aos profesionais sanitarios e aos pacientes. E establece un marco normativo para que non se volva producir a mesma temporalidade excesiva", asegurou a ministra de Sanidade.

O real decreto responde a unha reclamación histórica do sector, pero tamén a unha esixencia da Unión Europea para que España frease o abuso da contratación temporal no emprego público. O Executivo asegura que está negociado cos principais sindicatos do sector sanitario e coas comunidades autónomas, que xa iniciaron hai un mes os procesos de estabilización.

En virtude da nova norma, "antes do 31 de decembro han de ser publicadas todas as convocatorias" o que, engadiu Darias, "vai significar unha estabilidade moi importante para o persoal.

"Para aquelas persoas que levan traballando de maneira ininterrompida antes do 1 de xaneiro de 2016 vai establecer un concurso, presentarán méritos para optar a unha das prazas para acceder á fixeza", mentres que para aqueles que leven traballando desde o 31 de decembro de 2020 "tamén se establecerá un concurso oposición" engadiu.

A ministra lembrou que a nova lei establece dous grandes grupos de traballadores temporais: interinos, que cubrirán vacantes que non poidan ocupar traballadores fixos, e substitutos, para gardas, permisos ou vacacións.

Galicia xa estabilizou en maio 2.568 prazas

O conselleiro de Sanidade, Julio García Comesaña, dixo este martes que Galicia xa estabilizou 2.568 prazas de persoal sanitario das 67.000 anunciadas polo Goberno.

"Non son prazas novas, como parece desprenderse dalgunhas declaracións do Goberno, senón que forman parte dun proceso de estabilización continua", afirmou esta mañá o titular da Consellería de Sanidade.

Comesaña explicou que desas 67.000 prazas de sanitarios anunciadas polo presidente do Goberno a comunidade autónoma galega "achega 2.568 prazas", que o Diario Oficial de Galicia xa publicou o pasado mes de maio. Dese número de prazas, 230 xa están convocadas e pertencen a Enfermería, precisou.

Ademais, expuxo que durante os últimos anos conseguiron praza en propiedade na comunidade autónoma máis de 11.000 profesionais "a través dun proceso de convocatorias permanente".

Segundo as previsións do conselleiro, as medidas que neste ámbito laboral está a adoptar a Xunta van permitir que a taxa de estabilidade sitúese por baixo do 4 %, cando o obxectivo da Unión Europea está fixado por baixo do 8 %.

Por último, indicou que o que este martes aproba o Consello de Ministros "non é nin máis prazas, nin a estabilidade, esa decisión tomouna cada comunidade autónoma hai meses xa". "O que hoxe se aproba é a modificación do estatuto marco ao que obriga a UE, xusto no límite porque hoxe é o último día para facelo", subliñou.