O Goberno de Portugal declara a situación de seca extrema en case o 40 por cento do país

O Goberno de Portugal declarou este luns a situación de seca severa e extrema en preto do 40 % do territorio nacional, na metade sur do país, debido ás altas temperaturas e ás baixas precipitacións en marzo e abril.

En concreto, 40 concellos están en seca severa e 27 en situación extrema despois do "agravamento da intensidade" deste fenómeno a finais de abril, segundo un comunicado divulgado polo Ministerio de Agricultura e Alimentación luso.

A causa son "os valores das temperaturas media e máxima por encima do normal, así como o rexistro de ondas de calor que, conxuntamente coa reducida precipitación durante o mes de marzo e abril, resultou nun baixo depósito de auga no chan, con maior incidencia no sur do país".

Poucas precipitacións

Nas concas hidrográficas do sur non foi posible a recuperación hídrica polas precipitacións "pouco significativas ou nulas" durante o ano hidrolóxico. "Esta situación meteorolóxica afecta fortemente a actividade agrícola e o rendemento dos agricultores.

A ministra de Agricultura María do Céu Antunes indicou que "é de máxima importancia o recoñecemento desta realidade para que poidamos axudar os agricultores".

O Executivo de Portugal espera da Comisión Europea "un apoio firme para facer fronte a esta situación estrutural".

A declaración de seca extrema e severa permite ao Goberno avanzar con medidas sen necesidade de aprobación de Bruxelas, como o pastoreo en áreas de barbeito antes do 31 de xullo, flexibilizar a alimentación dos animais en modo de produción biolóxica ou ampliar o intervalo entre partos.

Tamén pasa, se é posible, por que as terras de barbeito se pastoreen ou se utilicen para colleita, a excepción do millo, a soia ou a matogueira de curta rotación.