O Goberno di que está listo para actuar contra os 'pellets' cando a Xunta eleve o nivel de alerta

O delegado do Goberno en Galicia Pedro Blanco deixou claro que o Executivo central está preparado para actuar con todos os medios necesarios ante a vertedura de pellets plásticos que chegou á costa galega cando a Xunta "eleve o nivel de alerta" por contaminación.

"Estamos preparados con todos os medios dispoñibles para actuar en canto a comunidade autónoma pulse o botón e eleve o nivel, xa que é competencia da Xunta, que ten que saber exercer", lembrou Blanco, quen insistiu en que o Goberno "non pode facer máis" que esperar ata que o Executivo autonómico solicite a axuda.

Segundo remarcou, tanto nas conversacións mantidas co conselleiro de Pesca, como a da vicepresidenta do Goberno e ministra de Transición Ecolóxica Teresa Ribera co presidente da Xunta Alfonso Rueda, o Goberno trasladou o seu compromiso coa comunidade autónoma á hora de actuar ante a vertedura.

Sobre o material plástico, Blanco mostrouse cauto e explicou que é "un problema de medio ambiente" ao entender que os pellets poderían "entrar na cadea alimenticia".

Con todo, valorou que as análises descartasen a súa toxicidade. "Parece que o único material contaminante que levaban, unha vez feitas as investigacións, estaba nun dos contedores", detallou.

Tamén detallou que a empresa xa se puxo en contacto coas autoridades e recoñeceu que os sacos eran da súa propiedade e que tiñan previsto facer fronte aos gastos pola contaminación.

As zonas máis afectadas serían principalmente a do Barbanza e a Mariña lucense, concluíu.