O Goberno insta as CC. AA. a que publiquen os modelos da PAU antes do 26 deste mes
O Goberno insta as CC. AA. a que publiquen os modelos da PAU antes do 26 deste mes
Os ministerios de Educación e Universidades pídenlles ás consellerías que o vindeiro curso os modelos de exame estean xa publicados en setembro
Arquivo / EFE / Lavandeira Jr
O Ministerio de Educación, Formación Profesional e Deportes; o Ministerio de Ciencia, Innovación e Universidades e representantes da Conferencia de Reitores das Universidades Españolas comprometéronse a instar as comunidades autónomas e distritos universitarios para que, antes do 26 de outubro, estean publicados todos os modelos de exame da nova proba de acceso á universidade (PAU).
Ademais, pídenlles ás consellerías de Educación das comunidades autónomas que no curso 2025/2026 as probas estean publicadas durante o mes de setembro de 2025.
Así o acordaron na reunión mantida este luns entre o Sindicato de Estudantes, o Ministerio de Educación e de Universidades e representantes da CRUE. Un encontro que se produce tras a convocatoria da folga estudantil do pasado venres.
Desde os ministerios implicados comprométense a dar unha "solución clara a unhas circunstancias que están a xerar un enorme desasosego e ansiedade entre os estudantes de Bacharelato".
De momento xa avanzaron que ao longo desta semana van seguir publicando as orientacións e modelos de exames, así como os criterios de corrección da PAU.
