O Goberno mantén a Álvaro García Ortiz como fiscal xeral do Estado ata 2027

Álvaro García Ortiz seguirá sendo fiscal xeral do Estado ata o 2027, unha decisión que aprobará o Consello de Ministros o vindeiro 28 de novembro. 

Fontes do Executivo salientaron que García Ortiz é unha persoa cun "recoñecido prestixio", que ocupa o cargo de fiscal xeral do Estado desde o ano pasado, cando substituíu a Dolores Delgado despois de que esta presentase a súa renuncia en xullo de 2022. Antes, fora a súa man dereita á fronte da Secretaría Técnica da Fiscalía.

Desde a súa chegada á Fiscalía Xeral do Estado, García Ortíz foi obxecto de críticas pola súa estreita relación con Delgado. De feito, unha das súas primeiras decisións foi ascender a súa antecesora a fiscal de sala, con destino na Sala do Militar do Tribunal Supremo, en contra do criterio da maioría do Consello Fiscal, que apostou polo extenente fiscal do Tribunal de Contas Luis Rueda pola súa ampla experiencia en dereito militar.

Rueda recorreu contra a dita decisión ante o Supremo, que acaba de darlle a razón anulando o nomeamento de Delgado para a Sala Quinta do TS, o cal deixa no aire a súa continuidade como fiscal de sala de Memoria Democrática e Dereitos Humanos.

Nomeamentos discrecionais 

A isto súmase a polémica desatada o pasado xuño, cando adiantou outro Pleno do Consello Fiscal para adxudicar unha serie de prazas, entre elas a de fiscal de sala de Memoria Democrática e Dereitos Humanos, á que aspiraba Delgado.

Tamén en contra do criterio maioritario, a exministra de Xustiza fíxose co posto, e outro candidato e as asociacións de fiscais AF e APIF recorreron ao Supremo contra este segundo nomeamento, aínda pendente de resolución.

 O caso Delgado e outros nomeamentos discrecionais provocaron críticas a García Ortiz da Asociación de Fiscais (AF) e da Asociación Profesional e Independente de Fiscais (APIF), que do mesmo xeito que fixeron con Delgado o acusan de favorecer os membros da Unión Progresista de Fiscais (UPF), á que pertenceron ambos.

Tamén este mesmo martes, dezaoito fiscais do Supremo emitiron un comunicado moi crítico co fiscal xeral ao entenderen que ignora as acusacións de lawfare ou persecución xudicial con fins políticos que contén o acordo alcanzado entre PSOE e Junts para a investidura de Pedro Sánchez.

Ademais, os seis vocais da AF no Consello Fiscal agardan aínda a resposta do xefe do Ministerio Público á súa petición de celebrar un pleno extraordinario para aprobar unha declaración institucional sobre a futura amnistía.