O Goberno quere regularizar migrantes sen papeis para sectores en que non hai traballadores

O Goberno prepara unha reforma normativa para incorporar traballadores estranxeiros ao mercado laboral. A iniciativa implica modificar a Lei de estranxeiría para facilitar a regularización de inmigrantes, reforzar a contratación nos países de orixe e permitir, tamén, que os estudantes estranxeiros se incorporen ao mercado laboral.  

O borrador do real decreto que deseñou o Ministerio de Inclusión, Seguridade Social e Migracións propón a creación do "arraigamento por formación", seguindo o modelo alemán. A argumentación para poñer en marcha esta reforma é eminentemente económica porque a lexislación de estranxeiría española caracterízase polos procedementos lentos.

Non hai datos oficiais, pero organizacións que traballan con inmigrantes en España calculan que hai medio millón de estranxeiros en situación irregular. O obxectivo é cubrir vacantes en sectores que demandan man de obra, como o transporte, o campo, a hostalería ou a construción.

A normativa que se pretende reformar esixe, no caso do arraigamento laboral, que o estranxeiro permanecera en España durante dous anos e que traballara de maneira regular ou irregular durante un período acreditado de seis meses.

No caso do arraigamento social, esixirase acreditar un período de permanencia en España de tres anos e ter vínculos familiares. Tamén se aceptará un informe que acredite a súa inserción na sociedade ou un contrato cunha duración mínima dun ano.