O Goberno reforza as prestacións e axudas para máis de 750.000 dependentes

O Consello de Ministros aprobou a reforma dun real decreto para mellorar as prestacións do Sistema de Atención á Dependencia, que beneficiará polo menos 750.000 persoas, como o aumento de horas de atención en domicilios ou unha contía mínima para todas as comunidades autónomas.

A reforma, impulsada polo Ministerio de Dereitos Sociais e consensuada cos gobernos autonómicos no Consello Territorial o pasado decembro de 2022, culmina o proceso de reversión dos recortes ao sistema entre 2012 e 2020, en liña co "compromiso de redución das listas de espera e mellora das condicións dos traballadores e das prestacións", destacou a ministra Ione Belarra.

Coa reforma, recupéranse e melloran os tres tipos de prestacións económicas en dependencia: as de coidados na contorna familiar, que aumentan un 17,65 %, e as vinculadas ao servizo e as de asistencia persoal, un 4,5 %, detallou a portavoz do Goberno Isabel Rodríguez na conferencia de prensa tras o último Consello de Ministros antes das eleccións do 23X.

O aumento nas prestacións económicas para coidados na contorna familiar, 17,65 %, "absorbe e supera o recorte do 14,9 % de 2012" e afecta a 540.000 persoas, que verán incrementadas as súas prestacións, cuantifica o Executivo.

Respecto ás prestacións económicas vinculadas ao servizo residencial e centros de día, cunha subida do 4,5 % alcanzan case 200.000 persoas; o aumento na mesma contía na asistencia persoal beneficiará 10.000 persoas.

Na regulación inclúese un incremento das horas mensuais en domicilio e a intensidade das axudas en todos os graos.

A reforma tamén establece contías mínimas que ata o de agora non estaban previstas na normativa estatal. Hai máis de 60.000 persoas con prestación económica que reciben menos de 100 euros ao mes e, destas, preto da metade recibe menos de 50 euros ao mes, lembra o departamento que dirixe Belarra.

"É unha resposta aos grandes acordos sociais", que garante un chan mínimo con independencia do lugar de residencia e tenta "dar seguridade e tranquilidade aos dependentes de hoxe", aseverou a portavoz, que lembrou que condiciona a aplicación do sistema pero "con respecto" ás competencias das comunidades autónomas.

O número total de atendidos polo sistema é de 1.340.272. Tras o Plan de Choque, acordado con axentes sociais e comunidades autónomas, aumentou o número de persoas atendidas desde xaneiro de 2021 un 23,6 % e reducíronse as listas de espera en case 90.000 persoas, quedando o tempo medio de tramitación dunha prestación en 328 días (129 menos).