O IV Simposio de Oncoloxía de Precisión reclama que estas terapias se inclúan no Sistema Nacional de Saúde

Unha vintena de especialistas presentan hoxe e mañá en Vigo os avances na procura de tratamentos contra o cancro deseñados á medida dos pacientes. É dicir, a chamada oncoloxía de precisión.

Por exemplo, nalgúns tipos de cancro de pulmón, estas terapias elevan por riba dos cinco anos a supervivencia, un obxectivo impensable ata hai pouco. Os tratamentos á carta, que teñen en conta o carácter único de cada doente e que por iso teñen máis posibilidades de éxito, son o futuro pero neste simposio de oncoloxía de precisión, os relatorios coinciden en reclamar xa a súa inclusión na carteira de servizos do sistema nacional de saúde. 

O cancro non é unha enfermidade igual para todos e coñecer que hai tantas diferenzas como persoas afina a procura do tratamento máis axeitado para cada caso. 

Na medicina de precisión, o diagnóstico molecular do cancro ten unha aliada imprescindible: a informática.

Os participantes neste cuarto simposio nacional de oncoloxía de precisión que se celebra en Vigo reclaman o acceso universal a estas terapias. 

Os tumores máis susceptibles de ser tratados con oncoloxía de precisión son unha parte dos de pulmón, os de mama, os colorrectais, os gástricos e os de próstata.