O líder supremo de Irán preside o funeral do presidente Raisi

O líder supremo de Irán Ali Khamenei presidiu este mércores o funeral do falecido presidente Ebrahim Raisi en Teherán nun acto a que asistiu a plana maior política e militar do país ademais de aliados rexionais, como o xefe político de Hamas.

Khamenei rezou na Universidade de Teherán ante os cadaleitos de Raisi, do ministro iraniano de Exteriores Hosein Amir Abdolahian e dos outros seis falecidos no accidente de helicóptero do pasado domingo no noroeste do país.

A máxima autoridade estaba flanqueada polo xefe do Estado Maior das Forzas Armadas de Irán, o xeneral de división Mohammad Baqeri; polo xefe do Poder xudicial Gholamhosein Mohseni Ejei, e o presidente do Parlamento, Mohammad Baqer Ghalibaf, entre outros, segundo mostraron as televisións locais.

Ao acto tamén asistiu o líder político do grupo palestino Hamas Ismail Haniyeh, quen acudiu para “ofrecer as condolencias dos grupos da resistencia” antiisraelí, e o secretario xeral adxunto de grupo libanés Hezbollah, o xeque Naim Qassem

Tras o rezo presidido por Khamenei comezou unha procesión dos oito cadaleitos desde a Universidade de Teherán ata a praza Azadi, que contaba con miles de persoas para despedir a Raisi, o presidente ultraconservador que chegou ao poder en 2021 nas eleccións coa participación máis baixa da historia da República Islámica.

Esta mesma tarde celebrarase outra cerimonia funeraria na honra dos falecidos coa presenza de varios mandatarios internacionais e unhas 20 delegacións internacionais.