Os ocupantes ilegais de Monte Alto cambian de casa
Os ocupantes ilegais de Monte Alto cambian de casa
Os veciños afirman que volveron ocupar unha casa tras ser expulsados da rúa Washington a semana pasada
Esta é unha das casas ocupadas no barrio coruñés de Monte Alto, segundo afirman os veciños. Unha casa, próxima á rúa da Torre, que xa fora ocupada ilegalmente hai anos e á que agora volveron os expulsados da rúa Washington a semana pasada.
"Marcharon de aí, marchan dous ou tres días, pero sempre queda algún e sempre lles serve de laboratorio".
"A min ocupáronme e tiven que tapiar, pero eu outros problemas non tiven".
"Bótalos fóra do piso, se non é deles, como os deixan estar aí?, pero se non é a xustiza...", din os veciños.
A rúa Santo Tomás é outra a onde puideron trasladarse os ocupantes ilegais. Os veciños afirman que sempre foi unha zona tranquila e que agora hai máis vixilancia policial.
"Nós nacemos aquí practicamente, e era outro ambiente".
"Vexo movemento de policía, iso si, que é o que teñen que facer", din unhas veciñas.
Os veciños da rúa Washington, onde os ocupantes ilegais foron expulsados a semana pasada pola presión da veciñanza, aseguran que agora viven máis tranquilos.
"Como non imos estar máis tranquilos, corazón? E grazas á xuventude, despois falan da xuventude, se non chega a ser por eles, non marchaban de aquí", afirma unha veciña.
Con todo, seguen vixiantes, sobre todo os comerciantes da zona, ante o temor dos roubos e do tráfico de estupefacientes.
