O Parlamento surcoreano destitúe o presidente do país por declarar a lei marcial

O Parlamento surcoreano aprobou este sábado a destitución do presidente, Yoon Suk-yeol, por declarar a lei marcial o pasado 3 de setembro e fíxoo co apoio de deputados da propia formación do mandatario.

Os 300 deputados da Asemblea Nacional participaron no proceso, co resultado de 204 votos a favor da moción presentada pola oposición para destituír a Yoon, 85 en contra, tres abstencións e oito papeletas nulas.

Para sacar adiante a moción eran necesarios polo menos 200 votos a favor (maioría de dous terzos), é dicir, como mínimo 12 deputados do conservador e gobernante Partido do Poder Popular (PPP) apoiaron a destitución, xa que a oposición suma 192 escanos.

A incerteza en torno ao resultado mantívose ata o final, co PPP celebrando durante horas unha reunión a porta pechada para fixar unha postura oficial e anunciando minutos antes do inicio da votación que a formación oficialmente non apoiaría a moción.

Queda claro tras coñecerse o escrutinio que non todos os escanos do partido -sete xa dixeran publicamente que votarían a favor de botar a Yoon- asumiron a postura oficial.

Tras o cálculo, Yoon quedou inhabilitado de inmediato e o primeiro ministro, Han Duck-soo, asume agora de xeito interino a xefatura de Estado e de Goberno.

O Tribunal Constitucional ten que determinar nun prazo máximo de 180 días se o presidente violou ou non a Carta Magna cando declarou a lei marcial o pasado 3 de decembro.

Inhabilitación

Se o Constitucional determina que si, Yoon sería o segundo presidente en exercicio inhabilitado en democracia no país, despois de que a tamén conservadora Park Geun-hye fora apartada do poder e encarcerada no 2017 por unha complexa trama de corrupción.

O liberal Roh Moo-hyun foi tamén destituído polo Parlamento no 2004 por unha suposta violación da lei electoral, aínda que o máximo órgano xudicial surcoreano fallou dous meses despois a favor de restituílo como presidente.

Fóra da Asemblea Nacional en Seúl miles de persoas congregadas para esixir a destitución de Yoon mostraron a súa alegría ao coñecer o resultado da votación.