O párroco de Vilardevós ten milleiros de seguidores nas redes sociais

"Este continente dixital hai que evanxelizalo tamén. Hai moita xente metida nos teléfonos e a esa xente hai que falarlle de Deus. As redes sociais foron para min un medio, unha ferramenta", explica o párroco David Roa.

E foi así como na pandemia comezou a retransmitir as misas a través de Internet.

"Primeiro por Instagram e despois por Facebook ou por Youtube, utilizaba todas as plataformas, e aí empezaron a crecer os seguidores".

Ten o seu público en Tik Tok, algo máis dun milleiro de seguidores, 20.000 no Instagram e tres veces máis en Facebook.

"Os seguidores de Facebook son moi variados e de distintos países, os de Instagram son máis de Venezuela, incluso dos Estados Unidos, e de moitos venezolanos que están noutros países".

O caso é que os seus seguidores aumentan pero tamén o número de fregueses que van á igrexa. O seu éxito nas redes xa é ben coñecido por todos.

"Pois agora si, eu non o dixera moito. Teño o proxecto de seguir transmitindo as misas dende aquí, dende estas igrexas. Teño que organizarme co son porque iso tamén dá traballo, os trípodes para o teléfono… para que isto sexa posible".

Semella que grazas ás redes pouco a pouco vaille pesando algo menos a morriña e apunta que se de algo non hai queixa é da conexión a Internet.