O paso da fronte fría deixa en Galicia case 6.000 raios e cortes puntuais de luz

Os galegos espertamos este domingo co son da tronada e nalgúns casos puntuais con cortes da luz. Nas últimas horas foron máis de 2.500 os raios recollidos en distintas zonas do país.

Víronse afectadas toda a provincia da Coruña e parte das provincias de Lugo, no noroeste, e de Pontevedra, no norte.

Os valores de choiva este domingo subiron ata os 46,4 litros por metro cadrado en Viveiro (Lugo) e 34 en varios puntos da provincia da Coruña, como Santiago ou Bergondo.

O refacho de vento máis intenso foi en Cuntis (Pontevedra) ás 8:20 horas, con 85,9 quilómetros por hora, mentres que onte á noite unha axada chegou a 108,6 ás 22:50 horas en Cedeira (A Coruña).

As temperaturas continúan nos valores das xornadas anteriores, cunha máxima de 20,4 graos en Marín (Pontevedra) e unha mínima de 5,8 en Calvos de Randín (Ourense).

Desde MeteoGalicia indican que a fronte trae inestabilidade e que a liña de treboadas estivo moi activa. Avisan de que a situación persistirá nas próximas horas.

Ata o mediodía está activo un aviso amarelo na Coruña e Pontevedra por acumulacións de auga importantes. No caso do litoral de Pontevedra  manterase ata as 18:00 horas.

A falta de enerxía está detrás de incidencias e atrasos que se rexistran no tráfico ferroviario. Adif informa dunha incidencia en Teixeiro, que lles afecta aos sinais de saída de Guitiriz e Curtis. A demora media estimada nos trens de media distancia afectados é duns 40 minutos.

Outro problema aparece entre Vilagarcía e Catoria, entre Catoira e Pontecesures e entre Pontecesures e Padrón, con atrasos dunha media de 30 minutos na media distancia.

O aparato eléctrico da forte treboada tamén causa cortes de luz puntuais e podería estar detrás dun pequeno incendio nun depósito de gas licuado nunha fábrica no polígono de Espiñeira en Boiro. Actuaron os bombeiros e o lume non se propagou, xa que o recipiente estaba case baleiro e puideron apagalo rápido.