O primeiro, a seguridade xuridica, por Venancio Salcines

Cen mil persoas en contra de Altri, trinta mil persoas segundo a policía local. Todos no Obradoiro, que ten unha extensión de sete mil metros cadrados. É dicir, entre vinte e sete persoas por metro cadrado!

Parece evidente que a política industrial de Galicia non pode deseñarse inflando ou desinflando o número de persoas que acoden a unha manifestación. E tampouco a pode deseñar un presidente de goberno ou de autonomía, e moito menos a cabeza dun comité central dun partido da oposición.

As axendas industriais deséñanse nos parlamentos, constrúense sobre leis e execútaas, cos corpos técnicos, o poder executivo. Por iso, o primeiro que ten que ter a nosa axenda industrial son regras de xogo claras, e o segundo, o seu cumprimento, o que se chama seguridade xurídica.

A calquera proceso investidor só temos que pedirlle que cumpra coa lexislación e teña a solvencia necesaria. Agora mesmo, o seu proxecto está enriba da mesa da administración, e ela, cos seus técnicos, terán que validar se é viable ou non. En canto á solvencia, é un problema financeiro ao que ten que dar resposta a propia empresa.

Se o proxecto require de subvencións discrecionais para ser viable, entón non falamos de seguridade xurídica senón de decisións políticas. E aquí o natural é que os responsables pensen no seu ideario e no seu electorado e actúen en consecuencia. Nesta liña, é claro que a manifestación de onte, con toda seguridade, será analizada e estudada en Madrid.