Caballero avanza "un proceso de escoita" para decidir se se presenta ás primarias

Metidos de cheo nas negociacións dos pactos postelectorais en concellos e deputacións e en pleno arranque da campaña para as eleccións xerais, o partido dos socialistas de Galicia abre unha nova convocatoria. Haberá primarias tras do verán para escoller o candidato á Xunta de Galicia.

"Calquera militante que considere que ten capacidade para ilusionar á militancia e xerar un proxecto gañador pode presentarse", di Luís Álvarez, voceiro do PSdeG no Parlamento.

O anunciou facíao o líder do partido en Galicia, Valentín González Formoso ante os 200 militantes que participaron no comité nacional, o máximo órgano entre congresos. Di que o fai con tempo dabondo  para ter preparado o partido para un posible adianto das eleccións autonómicas.

E por segunda vez, o propio Formoso sinalaba a José Ramón Gómez Besteiro, nada máis anunciar a convocatoria das primarias. "Temos unha cara que levabamos moito tempo sen ver, o compañeiro José Ramón Gómez Besteiro", aseguraba Formoso.

Formoso xa anunciara hai meses que non competería con Besteiro se decidía presentarse.

Canda Besteiro hai outros nomes coma o anterior secretario xeral do Partido, Gonzalo Caballero que se posicionan na carreira. "Quero agradecer as mensaxes de apoio e os folgos que estou recibindo por parte de tantos compañeiros de toda Galicia en relacion ás primarias do PSdeG. Escoitareinos a todos eles", afirmaba Caballero.

Besteiro deixará o seu cargo institucional como Delegado do Goberno en Galicia para encabezar a lista do PSOE pola provincia de Lugo para as próximas eleccións xerais.