O PSdeG critica o continuísmo e ofrécese como alternativa "libre de ataduras"

O socialistas galegos presentáronse esta mañá no debate de investidura como alternativa ao Goberno do PP na Xunta, reclamando a súa autonomía fronte a Ferraz, "libre de ataduras", como dixo o seu voceiro no Parlamento. Para Luis Álvarez, a súa é "unha alternativa que quere recuperar a ilusión e a confianza nesta terra".

Pero dende o PP, cuestionan o liderado desa proposta. 

"Agora mesmo non sei se estou falando co portavoz, co líder, co presidente saínte, co presidente entrante...é difícil...son un pouco de manta e cantimplora para saber como está o PSdeG", retroucoulles Alfonso Rueda.

O voceiro do PSdeG no Parlamento criticou, ademais, algunhas das propostas do novo xefe do executivo galego, entre elas, a rebaixa do IRPF, que considera insuficiente.

"Vostede propón deberes rimbombantes aos demais pero deixándoas na mínima expresión cando dependen de vostedes", díxolle Luis Álvarez a Rueda.

Contestoulles Alfonso Rueda instando os socialistas a que "proben a sensación de baixar impostos, xa verán como a xente llo agradece, xa verán como ese empeño en facer todo o contrario non leva a ningunha parte, cando máis falta fai que se baixen impostos, vostedes sóbenos".

Tirapuxa tamén á conta das propostas para a xuventude. 

"Que pode esperar a mocidade con fame de ter unha oportunidade laboral na súa terra? Un campamento de verán?", preguntou o portavoz socialista.

"A xente que necesita os campamentos para conciliar agradéceo moitísimo, a ver se nos poñemos no sitio", contestoulle Alfonso Rueda. 

Para o PSdeG-PSOE, a proposta de goberno de Alfonso Rueda carece de "ideas frescas e propostas de país", so ven "uns cantos retais recollidos de aquí e de aló que non son quen de facer un traxe á medida que Galicia necesita".

Pola contra, cre o novo presidente que "a xente quere gobernos responsables" fronte "as propostas irrealizables" que fai a oposición.