O rei Xoán Carlos volve a Sanxenxo

O rei Xoán Carlos aterrou este luns no Aeroporto de Vigo, procedente do de Vitoria, para iniciar a súa quinta visita a España este ano, a sexta desde que se instalou nosEmiratos Árabes Unidos en 2020.

En todas esas viaxes, salvo na máis recente, a do 18 aniversario da princesa Leonor, o rei aterrou en Vigo para posteriormente desprazarse a Sanxenxo, onde unha vez máis se aloxará na casa de Pedro Campos.

Como en anteriores ocasións, o seu amigo, que chegou ao aeroporto de Peinador ás 17:30 horas, acudiu a recibilo a pé de pista. Ás 18:35 abandonaron o aeroporto co emérito no asento do copiloto, con cazadora azul. 

Tamén o agardaban membros de seguridade e da tripulación do Bribón. Con esa embarcación ten previsto navegar na regata programada para a próxima fin de semana no Real Club Náutico de Sanxenxo. 

O pai de Filipe VI, que o 5 de xaneiro cumprirá 86 anos, instalouse nos Emiratos Árabes Unidos en 2020 pola polémica que suscitaron as súas irregularidades fiscais e a súa conduta persoal.