O Supremo anula a sentenza do TSXG sobre os eólicos de Campelo e abre a vía ao resto de proxectos denunciados

A xustiza volve apoiar a tramitación de novas instalacións eólicas en Galicia. O Tribunal Supremo anulou unha sentenza do Tribunal Superior de Xustiza de Galicia (TSXG) e deu a razón á Xunta alegando que non hai fragmentación indebida no proxecto do parque eólico de Campelo, entre os concellos coruñeses de Coristanco e Santa Comba.

A decisión do Supremo abre a vía a outras iniciativas parecidas denunciadas por suposta fragmentación de proxectos a potencias inferiores a 50 megawatts para beneficiarse así dun proceso acelerado de tramitación por parte da Xunta.

A Sección Quinta da Sala Terceira do Tribunal Supremo concluíu que a decisión do TSXG, impugnada en casación pola Xunta, se aparta da doutrina xurisprudencial, e por iso a revoga.

O Tribunal Supremo sinala: "O feito de que dúas ou máis instalacións de parques eólicos compartan instalacións de conexión non implica, ineludiblemente, que debamos considerar a existencia dun único proxecto de parque eólico para efectos da súa avaliación ambiental, senón que haberá que examinar en cada caso as circunstancias concorrentes, á luz da normativa e da xurisprudencia aplicables".

Por iso, o alto máximo tribunal indica que confirma a legalidade do acordo administrativo que autorizou o parque eólico de Campelo por parte da Xunta.

O Supremo tamén avala a actuación da Xunta de Galicia nos prazos de exposición pública .O Goberno galego agarda agora o pronunciamento europeo para poder reactivar o sector.

A paralización de proxectos tamén afecta outros sectores coma o da minaría. As empresas piden unha lexislación clara. 

97 proxectos paralizados

Un total de 97 proxectos eólicos, con miles de millóns de euros en investimentos, atópanse paralizados en Galicia por decisións do TSXG. Algúns deles de forma cautelar, ben por unha suposta fragmentación ou, sobre todo, por presuntamente representar riscos para o medio ambiente.

O proxecto de Campelo foi motivo dunha denuncia en xaneiro de 2022 por varias asociacións ecoloxistas contra a decisión da Xunta de aprobar a concesión de tres parques eólicos promovidos por Greenalia.

Nos tres recursos contencioso-administrativos presentados ante o TSXG, as asociacións ecoloxistas, entre elas a galega Adega, alegaban que os parques eólicos de Campelo, Bustelo e Monte Toural, están situados nos municipios de Coristanco, Santa Comba, Carballo e Tordoia, unha mesma área xeográfica ao redor da lagoa de Alcaián, da que conflúen a liñas de distribución da enerxía eléctrica e unha estación transformadora.

As entidades ecoloxistas denunciaron que a aprobación deses proxectos polo Goberno galego foron unha "fragmentación artificial" en base a unha acordo do Consello de la Xunta do 3 de maio de 2018 coa mención de ser de "interese especial", unha categoría aprobada nunha lei de 2017.

Dita lexislación prevé trámites prioritarios e aceleración burocrática á metade do tempo do prazo habitual de instrución e establece de maneira automática a prevalencia de utilidade pública dos parques eólicos que non deben superar os 50 megawatts, xa que se non o procedemento correspondería ao Goberno central.

O proxecto de Campelo xunto ao de Bustelo, están promovidos por Greenalia cunha potencia de 40,5 e 45 megawatts, respectivamente, prevé un investimento total de 75 millóns de euros e unha produción anual de 263,25 gigavatios hora, segundo o Observatorio Eólico de Galicia.

Unha nova sentenza favorable

Por outra banda, a sentenza que se coñeceu este venres fai o mesmo en relación a outras cuestións alegadas, aludindo á doutrina establecida polo Supremo noutras sentenzas. En concreto, unha da Sala do Contencioso-Administrativo do citado tribunal, que revogou a anulación, acordada polo TSXG, da resolución da Xunta pola que se outorgou a autorización previa e de construción do parque eólico de Corme G-3, no termo municipal de Ponteceso (A Coruña).

O TS estimou entón os recursos presentados pola empresa EDP Renovables, promotora do proxecto, e pola Xunta de Galicia, e confirmou a resolución administrativa de autorización previa ao considerar que non incorreu nos motivos de nulidade aceptados polo Tribunal Superior galego, cuxa sentenza anulou.

Conforme a todo iso, entende que a sentenza do TSXG, impugnada en casación, se aparta da doutrina xurisprudencial referida e non é axustada a Dereito, e por iso se revoga.

A Asociación Eólica de Galicia acolle a noticia con “cautela” 

“Case todos os proxectos paralizados polo Tribunal Superior de Xustiza de Galicia (TSXG) obedecen ás mesmas razóns que, outra vez, a Supremo tumba e anula. É un paso máis nos procesos xudiciais que afectan o sector, pero aínda debemos esperar a que se pronuncie o Tribunal de Xustiza da Unión Europea, instancia á que recorreu o TSXG expondo unha tripla cuestión prexudicial”, afirma a entidade que representa o sector eólico en Galicia.

EGA asegura que está a facer todo conforme a lexislación vixente e lembra que, actualmente, hai un centenar de parques sometidos a procesos contenciosos ou de suspensión cautelar.

O Observatorio Galego de Acción Climática, di a asociación, advertiu sobre a enorme dependencia de enerxía fósil,  e engade que a enerxía galega renovable se estancou nos últimos anos e apenas supera o 20% de toda a que se usa en Galicia.

A Xunta expresa a súa satisfacción

A Xunta expresou este venres a súa "satisfacción" pola decisión do Tribunal Supremo  que lle dá a razón e anula unha sentenza do Tribunal Superior de Xustiza de Galicia (TSXG) rexeitando unha autorización do Goberno autonómico ao proxecto de parque eólico de Campelo, no municipio coruñés de Coristanco.

A Xunta subliña na nota que a resolución do TS tamén "abre a porta para levantar a paralización doutros 64 parques eólicos decretada polo TSXG en resposta a 120 recursos".

 

Os ecoloxistas, pendentes do que diga a xustiza europea para decidir se recorren

A asociación ecoloxista Adega espera un consulta efectuada polo TSXG ante o Tribunal de Xustiza da Unión Europea  para determinar se presenta ou non un recurso.

O recurso previo de ADEGA alegaba que o parque de Campelo constitúe unha "fragmentación artificial" dun proxecto que inclúe os de Bustelo e Monte Toural, todos eles situados nos municipios de Coristanco, Santa Comba, Carballo e Tordoia, unha mesma área xeográfica ao redor da lagoa de Alcaián, da que conflúe a liña de distribución da enerxía eléctrica e unha estación transformadora.

As entidades ecoloxistas denunciaron que a aprobación deses proxectos fanse en base a un acordo da Xunta de 2018, que prevé unha tramitación abreviada e rápida a iniciativas menores de 50 megawatts, xa que de superalos require unha autorización máis esixente do Goberno central.

Os proxectos de Campelo, Bustelo e Monte Toural -dunha potencia de 40,5 megawatts, 45 megawatts e 18 megawatts, respectivamente- están promovidos por Greenalia, que ten no seu consello de administración á exconselleira de Medio Ambiente da Xunta Beatriz Mato. Durante o seu mandato se aprobou o citado procedemento abreviado.

A sección quinta da sala terceira do Tribunal Supremo indica que a decisión do TSXG, impugnada en casación pola Xunta, "apártase da doutrina xurisprudencial", polo que a revoga, e subliña que "o feito de que dous ou máis instalacións de parques eólicos compartan instalacións de conexión non comporta, ineludiblemente, que debamos considerar a existencia dun único proxecto".