O Supremo permite ás comunidades de veciños prohibir os pisos turísticos

O Tribunal Supremo avala o veto dos apartamentos turísticos nas comunidades de veciños que prohiben expresamente nos seus estatutos a utilización das vivendas para exercer unha actividade económica.

A Sala do Civil do alto tribunal ditou dúas sentenzas en que considera que o alugueiro de vivendas para uso turístico é unha actividade económica. O tribunal aclara que en ningún dos casos examinados se trata de aplicar a Lei de Propiedade Horizontal, que dispón que o acordo polo que se limite ou condicione o exercicio desta actividade requirirá o voto favorable das tres quintas partes dos propietarios, senón de determinar se nos estatutos comunitarios existe unha prohibición de destinar os pisos ao uso turístico.

Nunha das sentenzas, a sala dá a razón a unha comunidade de propietarios de Oviedo e ordena o cesamento da actividade de alugueiro turístico en dous pisos deste edificio de 20 de plantas. O tribunal explica que concorre unha prohibición estatutaria, cuxa validez non se discute, conforme á cal nas vivendas non se poderán exercer actividades profesionais, empresariais, mercantís ou comerciais de ningún tipo, e queda reservado o seu uso ao de carácter exclusivamente residencial.

No segundo caso, algúns propietarios de vivendas dun edificio de San Sebastián demandaron a súa comunidade co fin de que se anulase a prohibición recollida nas normas do edificio pola promotora, e incluídas nos contratos de compravenda de vivendas, que establecía que quedaba prohibida a realización de actividade económica salvo que a propia subcomunidade do portal o permitise por unanimidade. A Sala subliña: "O alugueiro de vivendas para uso turístico é unha actividade incluída na prohibición estatutaria, pois é unha actividade económica equiparable ás actividades económicas que se enumeran nos Estatutos, caracterizadas todas elas por teren usos distintos do de vivenda en que concorre un compoñente comercial, profesional ou empresarial".