O Tribunal Supremo rexeita que os fixos descontinuos podan optar á xubilación parcial
O Tribunal Supremo rexeita que os fixos descontinuos podan optar á xubilación parcial
![](https://img-g24-crtvg.flumotion.com/prog24/2024/20240410/SUPREMO.png)
O Tribunal Supremo rexeita que un traballador fixo descontinuo poida acollerse á xubilación parcial do mesmo xeito que os empregados a tempo completo.
O caso afecta unha traballadora dunha empresa de produtos gourmet ligada á compañía desde 1996 -antes desa data tivo contratos temporais- mediante contratos fixos descontinuos que non se repetían en datas certas, a xornada completa, ata 2019.
Entre abril e novembro de 2019 a demandante traballou ininterrompidamente a xornada completa, e en novembro de 2020 subscribiu un contrato a tempo parcial dun 20 % da xornada, asociado á simultánea celebración por parte da empresa dun contrato de substitución a tempo completo e duración indefinida. En novembro dese ano, pediu o recoñecemento dunha pensión de xubilación parcial, que lle foi denegada.
Tras recorrer, o Tribunal Superior de Xustiza do País Vasco considerou que non podía considerarse unha traballadora a tempo parcial, senón a tempo completo, e que no relativo ao acceso ás prestacións ás que ten dereito non podía facerse unha interpretación restritiva da norma.
O Supremo, en cambio, opina que o que delimita a natureza da relación "non é o tempo de traballo ao que se poida someter o contrato de traballo, senón a actividade que con el se vai atender, e que non comprende todas as xornadas de traballo que existan nun ano".
Para definir a que ten dereito a empregada hai que ter en conta as normas que regulan a afiliación, as altas e baixas e a cotización á Seguridade Social dos contratos a tempo parcial, engade a sentenza.
É certo que o contrato fixo descontinuo que non se repite en datas certas non é un contrato a tempo parcial, sinala o Supremo, pero desde a perspectiva da Seguridade Social non se trata dun traballador a tempo completo; non se corresponde por tanto cun contrato de traballo a tempo completo, aínda que fosen "asimilados" polo lexislador.
A xubilación parcial está destinada a aqueles traballadores que atenden unha actividade a tempo completo e pasan a desempeñar unha actividade a tempo parcial; o traballador fixo descontinuo, neste ámbito de protección, non ten encaixe na xubilación parcial ao non atender un traballo a tempo completo, conclúe a Sala.