O Tribunal Supremo rexeita suspender a execución da condena a Alberto Rodríguez

O Tribunal Supremo desestimou a petición do exdiputado de Unidas Podemos Alberto Rodríguez de suspender provisionalmente a execución da sentenza que o condenou por un delito de atentado a axentes da autoridade e que lle levou a perder a acta de parlamentario.

A sala segunda do alto tribunal rexeitou tamén a petición subsidiaria que reclamaba ao Supremo dirixirse á presidenta do Congreso dos Deputados, Meritxell Batet, en relación á execución da sentenza.

O auto, asinado polos sete maxistrados que formaron o tribunal que o xulgou, incluídos os dous xuíces que se opuxeron á condena, lembra que ao recorrente se lle impuxo unha pena dun mes e quince días e que a substituíu  por unha multa de 540 euros, e á pena accesoria de inhabilitación especial para o dereito de sufraxio pasivo durante o tempo da condena, o que derivou na perda da acta de deputado tras un longo debate sobre os efectos que debía ter a sentenza.

O Supremo desatende a petición do que tamén fora secretario de Organización de Unidas Podemos e respóndelle que "as consecuencias extrapenais", a retirada da acta, "non teñen a súa causa na execución da sentenza, senón no pronunciamento da condena".