O TSX de Madrid autoriza concentracións para rezar ante a sede do PSOE o 9-X
O TSX de Madrid autoriza concentracións para rezar ante a sede do PSOE o 9-X
O tribunal anula as resolucións da Xunta Electoral e a Delegación do Goberno que prohibían as manifestacións para os días 8 e 9 de xuño
![Manifestación contra a amnistía celebrada en Ferraz o 30 de maio. EFE / Borja Sánchez-Trillo](https://img-g24-crtvg.flumotion.com/prog24/2024/20240605/efe_manifestacion_ferraz_30_maio.jpg)
O Tribunal Superior de Xustiza de Madrid autorizou concentracións para rezar contra a lei de amnistía ante a sede do PSOE na rúa de Ferraz, en Madrid. Será na xornada de reflexión e na xornada electoral, os días 8 e 9 de xuño.
Nunha sentenza á que tivo acceso EFE, a Sala do contencioso-administrativo do TSX de Madrid estima o recurso presentado contra as resolucións da Xunta Electoral Provincial e do delegado do Goberno que prohibían esas concentracións para eses dous días.
Segundo a sentenza, que é firme e por tanto non recorrible, esas prohibicións vulneraban o dereito de reunión dos propoñentes, que como nos últimos meses convocaron un rezo do rosario nas escaleiras da parroquia situada a escasos metros da sede socialista.
Os rezos ante a sede do PSOE mantéñense desde as protestas de novembro de 2023 cando os socialistas e os independentistas cataláns pactaron a lei de amnistía que se acaba de aprobar e os seus promotores tramitaron unha nova autorización entre os días 31 de maio e 15 de xuño.
A Xunta Electoral autorizou as protestas ata o día 7 incluído, pero non así o 8 e o 9 por influír no proceso electoral, en tanto que a Delegación do Goberno non puxo obxeccións á protesta salvo nesas mesmas datas.
O TSX madrileño, con todo, sentencia que a decisión de non permitir a concentración os días 8 e 9 de xuño para así garantir a pureza do proceso electoral "non se xustifica e, por tanto, non obedece a ningunha razón fundada".
Os impulsores do rezo alegaron que a concentración non está vinculada a ningún candidato que vaia concorrer ás eleccións europeas nin a ningún partido político ao ser o lema da concentración "Rosario por España e en defensa da fe católica en todo o mundo".
Os maxistrados danlles a razón. Entenden que, aínda que non se di nada neste sentido de forma expresa nas resolucións recorridas, poida que a prohibición se deba "a meras sospeitas sobre a posibilidade de que a concentración eses dous días puidese perturbar a desexable neutralidade política propia da xornada de reflexión, así como o exercicio do dereito de voto dos cidadáns o día da xornada electoral".
"Pero insistimos, trátase de argumentos que esgrime a Avogacía do Estado, pero que nin sequera se recollen desta forma nas resolucións recorridas", expoñen os xuíces, que consideran que a doutrina constitucional di que para prohibir unha reunión débese ter a certeza de que "se convoca coa clara finalidade de obter sufraxios, o que non acontece neste suposto".
A concentración de Ferraz é para celebrar "un rosario por España e en defensa da fe católica en todo o mundo", polo que, segundo a sentenza, "con este obxectivo, non pode considerarse que a elección das datas para a realización da concentración que, doutra banda, e como indican os impulsores, leva convocándose ininterrompidamente desde o 12 de novembro de 2023, sexa a de facer coincidir de forma caprichosa as concentracións coa xornada de reflexión ou coa data das votacións nas eleccións convocadas nin influír dunha forma directa nos seus resultados".