O TSXG anula o permiso de explotación da mina de Penouta, a única de coltán de Europa
O TSXG anula o permiso de explotación da mina de Penouta, a única de coltán de Europa
O alto tribunal considera insuficiente o estudo de afectación ambiental, ao non incluír o impacto sobre a Rede Natura 2000
A sala terceira da Sala do Contencioso-Administrativo estima o recurso interposto por Ecoloxistas en Acción Galiza
O Tribunal Superior de Xustiza de Galicia (TSXG) declarou nula unha resolución administrativa que concede o pase á reserva de explotación de recursos da mina de extracción de estaño de Penouta, no municipio ourensán de Viana do Bolo, segundo a decisión divulgada este martes.
A sección terceira da Sala do Contencioso-Administrativo estimou o recurso interposto por Ecoloxistas en Acción Galiza, pois considera insuficiente o estudo de afectación ambiental, ao omitir o seu impacto na Rede Natura 2000, de protección ambiental promovida pola Unión Europea.
A sentenza do 7 de xuño indica que a promotora non realizou, nin a Administración a esixiu, "unha oportuna e adecuada avaliación" sobre o espazo de Pena Trevinca.
Engade que se limita a indicar que o proxecto non afecta a ningún espazo protexido, a pesar de que algunhas zonas ambientais de Pena Trevinca se atopan a "cero metros do enclave mineiro, constatándose que as masas de augas superficiais superan a normativa permitida para arsénico, mercurio, cadmio e chumbo".
O TSXG subliña que se acreditou "o impacto do po resultante de voaduras e movementos, así como gretas en vivendas e a afectación ás augas destinadas a consumo humano". Ademais, segundo a resolución, "as emisións e verteduras están a chegar á Rede Natura 2000, tanto por vertedura a leitos fluviais como por emisións atmosféricas".
O TSXG advirte de que nin a empresa nin a CHMS "realizaron novas analíticas en que se verifiquen os parámetros de arsénico, mercurio, chumbo e cadmio, substancias perigosas ou perigosas prioritarias" nin tampouco existen "controis periódicos que midan os niveis de tales metais pesados" a pesar de que "os regachos afectan a leitos dos que se obtén auga para o consumo humano".
A sala avisa de que as verteduras procedentes da mina poden estar a causar "unha afección á saúde das poboacións".
A sentenza non é firme e contra ela aínda cabe presentar recurso de casación ante o Tribunal Supremo.
