O xurumelo, fillo do cebolo e a cebola de San Cosme, triunfa nos grandes restaurantes

A cebola é a estrela nas hortas de Albeida, Bara e outros lugares do concello de Outes. Están na área de parroquia de San Cosme que lle dá nome a un cultivo tradicional e diferenciado que proporciona un produto único.

"A cebola de San Cosme é unha cebola espectacular; non pica, é moi suaviña... A caraterística é que facemos todo aquí: collemos a semente, plantamos o ceboliño, vén a cebola. Todo autóctono, cun método que vén de tempos remotos", di María Rosa María Martínez Romero, agricultora e mariscadora.

Ao cebolo e á cebola de San Cosme saíulle un fillo: o xurumelo, que vén ser o gromo que sae dunha cebola soterrada. Ademais da súa aceptación en restaurantes selectos, o xurumelo será unha axuda de cartos para estes pequenos produtores.

Carlos Rodríguez, axente de Desenvolvemento Local de Outes explica que "houbo algunha produtora que decidiu probar co xurumelo e a nosa gran sorpresa foi que hai locais, restaurantes moi interesados en facer as xornadas do xurumelo. Descubrimos que aí había posibilidades de mercado que en Outes non se estaba a ter en conta e que pode axudar a potenciar a economía da cebola".

Os impulsores do xurumelo  aspiran a que alcance a ampla valoración do cebolo; a planta que levan para moitas zonas do país, pero que en ningún outro sitio dá cebolas como as de aquí.

María Rosa conclúe que "a nosa terra é especial para a cebola. Nunca vai saber igual unha cebola de fóra como a criada aquí".