Oito centros galegos optan ao Premio Stephen Hawking de investigación científica
Oito centros galegos optan ao Premio Stephen Hawking de investigación científica
O IES Rosalía de Castro de Santiago valora os 40 traballos presentados e esta tarde dará a coñecer o gañador
A paleontóloga galega María Martinón preside o xurado: "Hai futuro para o homo sapiens, e está en mozos coma estes"
Esta tarde darase a coñecer o gañador do quinto premio Stephen Hawking de Investigación Científica, que convoca o Instituto Rosalía de Castro, de Santiago. Oito centros galegos de secundaria presentaron 40 traballos, principalmente de bioloxía, química e matemáticas.
As 41 alumnas e 22 alumnos participantes expoñen hoxe as súas propostas ante o xurado, que está presidido por María Martinón, directora do Centro Nacional de Investigación sobre a Evolución Humana. A paleontóloga galega destacaba a variedade e calidade dos proxectos presentados.
"Cóbrense todos os aspectos cun nivel moi importante de contido, pero sobre todo eu destacaría o nivel das preguntas. Esa capacidade de formularse formas novas de interrogar a realidade e o mundo que os rodea. Eu resumiríao en que hai un futuro para o homo sapiens, e está en mozos como estes".
