Os bombeiros de Lugo homenaxean a Paula Alvarellos no día do seu patrón
Suspenden os actos festivos e realizan un desfile silencioso para gardar un minuto de silencio na praza Maior na memoria da alcaldesa falecida hai uns días
Os bombeiros de Lugo suspenderon os actos para commemorar o seu patrón por causa do falecemento da alcaldesa pero decidiron renderlle, ademais, unha homenaxe a Paula Alvarellos.
Unha representación dos seus efectivos con tres camións do parque de bombeiros da cidade percorreron a avenida da Coruña, a ronda da Muralla para rematar na praza Maior, nun desfile con luces pero sen sirenas.
Alí os bombeiros baixaron dos vehículos e tras seren recibidos pola corporación municipal, co alcalde accidental á fronte, gardaron un minuto de silencio na memoria de Paula Alvarellos. Logo regresaron ao Parque Municipal de Bombeiros.
