Os bombeiros sufocaron un incendio rexistrado nunha máquina expendedora no barrio coruñés dos Mallos

Completamente calcinada. Así quedou esta máquina expendedora da avenida dos Mallos, na Coruña. Pouco antes das nove da mañá, os bombeiros desprazáronse ata o lugar logo de que unha veciña dese a voz de alarma.

Unha cámara de seguridade gravou as imaxes en que se ve unha persoa no baixo. Moitos veciños bótanlle a culpa deste incidente ao vandalismo que din que sofren acotío.

A Policía Nacional xa ten as imaxes e agora encárgase da investigación para tratar de dar co autor destes actos vandálicos.