Os carburantes encareceron a ponte de agosto, tras a súa sexta alza consecutiva

A gasolina e o gasóleo encareceron de media na última semana un 0,71 % e un 2,1 %, respectivamente, co que encadearon a súa sexta subida consecutiva, coincidindo coa saída da operación especial pola ponte de agosto, en que se prevían 8,5 millóns de desprazamentos por estrada.

De acordo co Boletín Petroleiro da Unión Europea (UE), que recolle os datos de máis de 11.400 estacións de servizo en España entre o 8 e o 14 de agosto, o prezo medio da gasolina situouse en 1,692 euros o litro, mentres que o gasóleo custou uns 1,586 euros.

Este avance fai que a gasolina rolde novamente os rexistros de mediados de 2022, en plena crise enerxética pola invasión rusa de Ucraína, coa diferenza de que por aquel entón aínda estaba en vigor o desconto de 20 céntimos por litro aprobado polo Goberno.

Sempre aplicando a citada rebaixa, o prezo medio deste carburante entre o 26 de xullo e o 1 de agosto do pasado exercicio foi de 1,702 euros/litro (sen bonificación sería de 1,902 euros/litro), coincidindo coa grande operación saída dese verán.

Os prezos de ambos os carburantes, iso si, están lonxe dos máximos históricos que alcanzaron en xuño de 2022, xa que a gasolina custa un 12,8 % menos e o gasóleo, un 16,5 % menos.

Aos prezos actuais encher con gasolina un depósito de 55 litros custa 93,06 euros, mentres que se se enche con gasóleo, o prezo é de 87,23 euros, o que supón un incremento de 5,2 euros respecto a hai un ano e unha rebaixa de 1,1 euros no segundo.