Os cursos para recuperar puntos do carné acúrtanse e permitirán obter catro puntos

Os cursos de recuperación parcial de puntos do carné de conducir terán unha duración de 10 horas lectivas fronte ás 12 actuais que permitirán obter 4 puntos (dous menos que agora) e a parte específica que se realiza de forma individualizada en función do perfil do condutor poderase seguir online.

Estas son as principais novidades recollidas na orde ministerial pola que se regulan os cursos de sensibilización e reeducación viaria para os titulares dun permiso ou licenza que perderon parcial ou totalmente os puntos e que publica este mércores o Boletín Oficial do Estado.

A Lei de tráfico e seguridade viaria establece dous tipos de cursos: os de recuperación parcial de puntos e os de recuperación do permiso ou licenza de condución.

No primeiro caso, a duración mínima destes cursos será de 10 horas, 7 delas para a parte común: 4 destinadas a formación xeral, unha de dinámica de grupo dirixida por psicólogos-formador, outra para testemuños de vítimas e unha última hora de contido variable.

O tempo destinado ás dinámicas de grupo aumentouse por considerar que os alumnos interiorizan mellor as mensaxes, mentres que a participación de vítimas establécese con carácter preceptivo.

O motivo da redución de horas lectivas ten que ver coa próxima aprobación dos cursos de condución segura e eficiente que permitirán recuperar tamén puntos e que terán un carácter moito máis práctico, precisaron dende a DXT.

As 3 horas restantes ata 10 son para a formación específica, que será individualizada en función do perfil infractor do condutor e poderase seguir en liña mediante teleformación ou aula virtual.

Establécense novos perfís relacionados coas distraccións ou as condutas imprudentes en motoristas, pero tamén coa velocidade, o alcol e outras drogas.

A realización deste curso permitirá ao condutor recuperar 4 puntos, sen que en ningún caso poida obter máis dos que perdese.

Só se pode realizar unha vez cada dous anos, excepto os condutores profesionais que poden facelo unha vez ao ano, periodicidade que non cambiou.

Respecto aos cambios no curso de recuperación do carné, a duración mínima será de 20 horas fronte ás 24 actuais: 16 para a parte común (9 de formación xeral, 4 de dinámica de grupo, 1 para unha vítima e 2 de contido variable).

A parte específica terá unha duración de 4 horas, que tamén é individualizada en función do perfil infractor de cada condutor.

A DXT lembra que están obrigados a realizar este curso os condutores que perderon o seu saldo de puntos e os que foron condenados por sentenza xudicial con privación do dereito para conducir. Ademais, deberán superar un exame para volver obter o carné.

A orde ministerial entra en vigor o 4 de novembro e os cursos anteriores a esta data rexeranse pola normativa vixente no momento de iniciarse.

A día de hoxe, xa hai máis de 900 centros, dentro do ámbito de DXT, que imparten estes cursos.