Os donos de pisos turísticos terán que ofrecer máis información ás autoridades
Os donos de pisos turísticos terán que ofrecer máis información ás autoridades
Deberán ter un número de rexistro público e terán que dar datos mensuais á sobre o número de noites e de hóspedes aos que se ofreceu aloxamento
Os países da Unión Europea chegaron este xoves a un acordo para obrigar ás plataformas de alugueiros turísticos como Airbnb a ser máis transparentes, co obxectivo de combater os pisos ilegais e poder desenvolver mellores políticas de acceso á vivenda.
A normativa, que aínda ten que entrar en vigor, obrigará aos propietarios dos pisos a ter un número de rexistro público que terán que mostrar aos clientes e que lles permitirá identificarse ante as autoridades.
As plataformas, ademais, terán que proporcionar datos mensuais á administración sobre o número de noites e de hóspedes aos que se ofreceu aloxamento.
Unha proposta que a España lle parece "razoable", porque supón "un paso máis da UE na loita contra a fraude no sector turístico", segundo dixo a secretaria de Estado de Turismo, Rosana Morillo, durante a súa intervención no debate que mantivo cos seus homólogos europeos.
"Axudará a evitar a oferta ilegal, a cal causa conflitos nas comunidades locais, aumentando o problema de acceso á vivenda e a competencia desleal", sinalou.
O intercambio de datos entre as plataformas e as autoridades axudará ademais á administración para desenvolver políticas públicas en materia, por exemplo, de transporte, de recollida de lixos e, en xeral, de xestión sobre os fluxos turísticos.
Bruxelas quere harmonizar a regulación no mercado único, xa que os alugueiros de curta duración impulsados polas plataformas dixitais representan aproximadamente un 25% dos aloxamentos turísticos na UE, unha tendencia que continuou tamén durante a pandemia, segundo os datos da Comisión Europea.
O Parlamento Europeo aínda ten que pronunciarse sobre o texto no segundo semestre deste ano, nunha normativa que terá que seguir impulsado España durante a presidencia rotatoria da UE que asuma a partir do 1 de xullo.
Nun comunicado emitido tras a votación de hoxe no Consello da UE, Airbnb dixo que "hai unha serie de zonas na UE, como Barcelona e Bruxelas, onde as normas sobre alugueiros de curta duración restrinxen a posibilidade dos anfitrións para beneficiarse do uso compartido do fogar" e pediu aos lexisladores europeos que aborden esta cuestión durante as negociacións.
