Os feridos polo accidente de bus nos lagos de Covadonga evolucionan favorablemente
Os feridos polo accidente de bus nos lagos de Covadonga evolucionan favorablemente
Entre os 49 ocupantes do vehículo había dez menores de entre oito meses e 13 anos, aínda que ningún deles sufriu feridas de gravidade
![](https://img-g24-crtvg.flumotion.com/prog24/2023/20230801/AccidenteCovadonga.png)
Seis dos 49 feridos no accidente que sufriu este luns un autobús entre Covadonga e os Lagos, na vertente asturiana dos Picos de Europa, continúan hospitalizados e evolucionan favorablemente.
Dous dos feridos atópanse no Hospital Universitario Central de Asturias, en Uvieu, e outros catro continúan ingresados no Hospital de Arriondas, onde outro foi dado de alta este martes.
O accidente deixou seis persoas feridas graves "con prognóstico reservado", outros seis menos graves e 37 leves, moitos dos cales recibiron a alta ás poucas horas.
Entre os 49 pasaxeiros había dez menores de entre oito meses e 13 anos, aínda que ningún deles sufriu feridas de gravidade.
O accidente tivo lugar pouco antes das doce do mediodía á altura do quilómetro oito da estrada que une Covadonga e os Lagos.
Dada a elevada frecuencia de viaxeiros que hai no verán, o traxecto ten limitada a circulación de vehículos privados e cóbrese principalmente con autobuses.
O autobús accidentado saíuse da calzada pola marxe dereita tras superar o Miradoiro da Raíña e, segundo testemuñas presenciais, tras dar dúas voltas de campá, detívose sobre un dos seus costados nunha zona en pendente.
Aínda que as causas do accidente están a ser obxecto de investigación, algúns pasaxeiros comentaron que o autobús ía a pouca velocidade e que envorcou despois de frear ao cruzarse con outro vehículo que circulaba en dirección contraria.
O autobús, cunha antigüidade de nove anos e catro meses e equipado con cintos de seguridade, pasara a ITV e unha revisión interna recentemente e o condutor, un profesional con 21 anos de experiencia que habitualmente fai este traxecto, fixera o seu descanso regulamentario os días 25 e 26 de xullo, segundo Alsa.
Este roteiro na zona máis visitada dos Picos de Europa lévana a cabo "os condutores máis experimentados" e, segundo a compañía, contan ademais cunha "formación específica en condución en estradas de alta montaña".
Alsa é a encargada de xestionar o plan de acceso a Covadonga e os lagos desde que o Consorcio de Transportes de Asturias puxo en marcha hai 18 anos para evitar os grandes atascos e problemas que se xeraban nos meses estivais e algunhas festividades pola grande afluencia de turistas.
Durante o pasado ano, máis de 250.000 turistas utilizárono para ir a esta zona de Picos de Europa, a máis visitada do parque, e segundo Alsa, nos 18 anos que leva dando este servizo transportaron a máis de 2,5 millóns de persoas sen rexistrar ningún accidente similar ao deste luns.